Ajitha Balakrishnan (CLICK IMAGE FOR MORE PHOTOS)

 

കൈരളി, സൂര്യ, ജീവന്‍ എന്നിങ്ങനെ പല ചാനലുകളിലൂടെ ഈ മുഖം നമുക്കു പരിചിതമാണ്. കാരണം കോംപയറിങ്ങിലൂടെയാണ് അജിത പരസ്യ ലോകത്തെത്തിയത്. മോഡലിങ്ങ് എന്ന തന്റെ പുതിയ മേഖലയെക്കുറിച്ചു പറയുകയാണ് അജിത.

 

എത്ര നാളായി മോഡലിങ്ങില്‍ ശ്രദ്ധിച്ചു തുടങ്ങിയിട്ട്?

രണ്ടു മാസമേ ആയിട്ടുള്ളു. പത്തില്‍ കൂടുതല്‍ പരസ്യങ്ങള്‍ ചെയ്തു കഴിഞ്ഞു. നല്ലപോലെ അവസരങ്ങള്‍ ഉള്ള രംഗമാണിത്. ആദ്യം മുതലേ നിരവധി അവസരങ്ങള്‍ ലഭിച്ചിരുന്നെങ്കിലും ഈ രംഗത്തേ കുറിച്ചുള്ള എന്റെ കാഴ്‌ചപ്പാട് നെഗറ്റീവ് ആയിരുന്നു. ഇപ്പോള്‍ കൂടുതല്‍ അടുത്തറിഞ്ഞപ്പോഴാണ് യാതൊരു പ്രശ്‌നവുമില്ലന്നും അതെല്ലാം എന്റെ തെറ്റിദ്ധാരണയായിരുന്നെന്നും മനസ്സിലായത്. പിന്നെ എന്‍ജിനീയറിങ്ങ് പഠിപ്പൊക്കെ കഴിഞ്ഞ് ഇപ്പോഴാണ് ഞാന്‍ കൂടുതല്‍ ഫ്രീ ആയത്.

 

ശ്രദ്ധേയമായ പരസ്യങ്ങള്‍ ?

പലതും റിലീസ് ആയി തുടങ്ങുന്നതേയുള്ളു. ഈസ്റ്റേണ്‍ സാമ്പാര്‍പൗഡര്‍, മരുത്വാ, ഏലാദി, വീഗാലാന്റ്, മാതൃഭൂമി കവര്‍ഗേള്‍, അക്വാ വാട്ടര്‍പ്യൂരിഫയര്‍ എന്നിങ്ങനെ കുറച്ചു ചെയ്തു കഴിഞ്ഞു.

 

ആങ്കറിങ്ങാണോ മോഡലിങ്ങാണോ കൂടുതല്‍ ഇഷ്ടം?

അങ്ങനെ പറയാനാവില്ല. കാരണം ആങ്കറിങ്ങ് എനിക്കു പഠിക്കുമ്പോഴേ ഇഷ്ടമായിരുന്നു. ശരിക്കു പറഞ്ഞാല്‍ ഒരു ആഗ്രഹം തന്നെയായിരുന്നു. എന്നാല്‍ ഇപ്പോള്‍ മോഡലിങ്ങ് ചെയ്തു തുടങ്ങിയപ്പോള്‍ നമ്മള്‍ ഒരു ഉല്പന്നത്തിന്റെ വക്താവാകുന്നതിന്റെ സുഖം അറിയാനാവുന്നുണ്ട്.

 

റാമ്പ് ഷോസ് ചെയ്യണമെന്നു തോന്നിയിട്ടില്ലേ?

ഞാന്‍ എല്ലാ വസ്ത്രങ്ങളിലും കംഫര്‍ട്ടബിള്‍ അല്ല. ഷോട്ട്‌സ് പോലുള്ള ഡ്രസ്സുകള്‍ ഇടാന്‍ ബുദ്ധിമുട്ടാണ്. നാളെ ഈ ധാരണ മാറില്ല എന്നൊന്നും പറയുന്നില്ല. കാരണം ഞാന്‍ പണ്ട് സ്ലീവ്‌ലസ്സ് ഡ്രസ്സ് ഉപയോഗിക്കാത്ത ആളായിരുന്നു എന്നാല്‍ ഇപ്പോള്‍ അതൊക്കെ ഉപയോഗിച്ചു തുടങ്ങി. അതുകൊണ്ട് റാമ്പ്‌ഷോ സ്വപ്നങ്ങളൊന്നും ഇപ്പോഴില്ല.

 

ഈ രംഗത്തേക്കുള്ള പ്രചോദനം?

ചാനല്‍സ് തന്നെയാണ് മുഖ്യ പ്രചോദനം. പിന്നെ അനിയത്തി അശ്വിനിയുടെ പ്രോത്സാഹനവും.

 

ഒരു മോഡലിന് അടിസ്ഥാനമായി ഉണ്ടായിരിക്കേണ്ട ഗുണങ്ങള്‍?

ആറ്റീറ്റിയൂഡ് അത്യാവശ്യമാണ്. ക്യാമറയ്ക്കു മുന്നില്‍ നില്‍ക്കുമ്പോള്‍ ഡ്രസ്സെങ്ങനെ, മേക്കപ്പെങ്ങനെ എന്നീ കാര്യങ്ങളെ കുറിച്ച് ബോധവതിയാകേണ്ടതില്ല. കാണാന്‍ അത്യാവശ്യം സൗന്ദര്യം, ഡ്രസ്സിങ്ങ് സെന്‍സ് ഇതാണ് വേണ്ടതെന്നാണ് എനിക്കു തോന്നിയിട്ടുളളത്. ഇപ്പോള്‍ അനുഭവങ്ങള്‍ കൊണ്ട് പലതും മനസ്സിലാക്കി വരുന്നു.

 

അജിതയ്ക്കു വേണ്ടി ഡ്രസ്സൊക്കെ തിരഞ്ഞെടുക്കുന്നത്?

എന്റെ ഡ്രസ്സുകളെല്ലാം അശ്വിനിയുടെ സെലക്ഷനാണ്. ഇത്തരം കാര്യങ്ങളില്‍ നല്ല സെന്‍സുളള കൂട്ടത്തിലാണവള്‍. ഇപ്പോള്‍ എന്‍ ഐ എഫ് ടിയില്‍ പഠിച്ചു കൊണ്ടിരിക്കുന്നു. കോംപയറിങ്ങിനും മറ്റും പോകുമ്പോള്‍ എനിക്കാവശ്യമുള്ള ഡ്രസ്സുകള്‍ ഡിസൈന്‍ ചെയ്യുന്നതൊക്കെ അവളാണ്. ശരിക്കു പറഞ്ഞാല്‍ അനിയത്തിയാണെന്റെ ശക്തി എന്നു പറയാം.

 

ഏറ്റവും പണം ചെലവാക്കുന്നത് ഡ്രസ്സിനാണോ?

ഡ്രസ്സിനും, പെട്രോളിനുമാണ്.

 

ഡ്രസ്സില്‍ പ്രത്യേക ഇഷ്ടങ്ങള്‍?

ഗൗണ്‍ മോഡല്‍ ഫ്രോക്ക് ഇഷ്ടമാണ്. ഇതിന്റെ വലിയൊരു ശേഖരം തന്നെയുണ്ട്. ഞാന്‍ ഏറെ കംഫര്‍ട്ടബിളായ വേഷവുമിതാണ്. പക്ഷെ ഫ്രോക്ക് കൂടുതലും ആങ്കറിങ്ങിനൊക്കെയാണ് ധരിക്കാറുള്ളത്. പുറത്തൊന്നും പോകുമ്പോള്‍ ഉപയോഗിക്കാനാവില്ല.

 

ആക്‌സസറീസ് ധരിക്കാറുണ്ടോ?

മാല ഇടാറില്ല. ഡ്രസ്സിനു യോജിക്കുന്ന കുന്തന്‍വര്‍ക്കു ചെയ്ത ആക്‌സസറീസൊക്കെ അശ്വനി ഉണ്ടാക്കി തരാറുണ്ട്. അതൊക്കെ ഇടും.

 

മേക്കപ്പ് ഇഷ്ടപ്പെടുന്ന കൂട്ടത്തിലാണോ?

മേക്കപ്പിടാന്‍ പണ്ടു മുതലേ ഇഷ്‌ടമാണ്. എന്നാല്‍ മിക്കവാറും മൂഡനുസരിച്ചേ ഇടാറുള്ളു എന്നു മാത്രം. ആദ്യമൊക്കെ ക്രെയ്‌ലോണിന്റെ പ്രോഡക്ടുകളാണ് ഉപയോഗിച്ചിരുന്നത്. പക്ഷേ വേറെ ബ്രാന്‍ഡ്‌സും തിരഞ്ഞെടുക്കാറുണ്ട്. ഐ മേക്കപ്പാണ് ഏറ്റവും ഇഷ്ടം.

 

ശരീരസൗന്ദര്യം കാത്തുസൂക്ഷിക്കുന്നത്?

വീട്ടില്‍ ട്രെഡ്മില്‍ ഉണ്ടെങ്കിലും എപ്പോഴും വ്യായാമം ചെയ്യുന്ന സ്വഭാവമൊന്നുമില്ല. വെജിറ്റേറിയന്‍ ആണ്. പിന്നെ എന്തു കഴിച്ചാലും ഒരു പരിധിയില്‍ കൂടുതല്‍ തടി വയ്ക്കുന്ന പ്രകൃതമല്ല. ഫ്രൂട്ട്‌സ് കഴിക്കും. വെളളം കുടിക്കണമെന്നറിയാമെങ്കിലും ഇപ്പോഴേ ആ ശീലം തുടങ്ങിയിട്ടുള്ളു. എന്നെ ഏറ്റവും ബാധിക്കുന്നത് ഉറക്കകുറവാണ്.

 

സിനിമയാണോ അടുത്ത ലക്ഷ്യം?

നല്ല അവസരങ്ങള്‍ കിട്ടിയാല്‍ മാത്രം ചെയ്യും. എന്നാല്‍ അതു മാത്രമല്ല ലക്ഷ്യം. നല്ലൊരു മോഡലാവുക, ഉപരി പഠനം എന്നിങ്ങനെ കുറെ പ്‌ളാനുകളുണ്ട്.

 

കുടുംബം?

അച്ഛന്‍ ഡോക്ടര്‍ ബാലകൃഷ്ണന്‍, അമ്മ രൂപ എസിബിഐയില്‍ ജോലി ചെയ്യുന്നു. ചേട്ടന്‍ ഹോട്ടല്‍ മാനേജ്‌മെന്റ് കഴിഞ്ഞു, പിന്നെ അനിയത്തിയുടെ കാര്യം പറഞ്ഞല്ലോ. ആലുവയിലാണ് ഞങ്ങള്‍ താമസം.